UJIAN MAHA KUASO

(Ayia Mato 50 Kota)

Tasabuik malang sakijok mato
Tibo di mujua sapanjang hari
Allah Ta'ala Maha kuaso
Sadang di ui imam di diri

Sadangnyo Arek Paneh bamain
Gabak bararak di ateh gunuang
Udaro angek baransuaa dingin
dibaok awan hitam baguluang

Indak manunggu nunggu bana
Rintiak batuka manjadi hujan
mambasuah Luhak 50 kota
manyiram bukik ranah Pangkalan

Antah kok gabak mambaok dandam
antah kok baban barek bapikua
Ayia nan turun badaram daram
samakin labek hujan mangucua

Alam samulo manari nari
manyangko Hujan Turun sadarok
lah mulai kini marusuah diri
alamaik dendang ba ujuang Ratok

Bak abih dayo urek surian
Hilang tanago tunggua baringin
tanah takikih di giriak hujan
ditahan juo raso tak mungkin

Antah cobaan Tuhan Kuaso
antah dek ulah tangan ,manusia
Mangko ba ulang datang bancano
nan lamo masih juo takana

Rangkah lah sudah bukik pangkalan
Koto Alam Takajuik cameh
bukik nan tinggi maraok taban
mangubua apo sajo malinteh

Rang Minang baliak karantau
ka kampuang urang mambaok aso
Rupo takadia lain ma imbau
Tanah kuburan molah kironyo

Pakiak Jo tangih bajadi jadi
sapadiah rarau Gunuang Malintang
Dandam ayia manjadi jadi
antah kok alun juo kasanang

Asuang pitanah Hujan nan labek
dari nan Hulu sampai ka hilia
mangkonyo Libak si Batang Maek
Janji ka ranah tabaok Mungkia

Kapur Sembilan bak tabek dalam
Limbanang Baruah bakayuah sabak
alun salalai luluang Di Taram
alah basambuang di Sarilamak

Nagari Mungka bak ilang Aka
Batu Balang Tak Kuriak Lai
Batenggang malang Bukik Sikupa
Kama mangadu Ranah Suliki

Musajik jo surau abih Tarandam.
Gonjoang tak lai manjulang tinggi
Rangkiang manggigia nan jo mandamam
kamalah ubek ka Ruyuang cari

Ladang jo parak manjadi tabek
labuah jo laman lah jadi sawah
ulah dek dandam hujan nan labek
dek Batang Maek talulua sumpah

tidolah sanang ikan jo baluik
dapek baranang sinan kasiko
nyampang tabaok badan ka lawuik
didalam ayia kamati juo

Balam lah cameh didahan tinggi
sayok lah barek dek basah kuyuik
dek Gatah Pikek Bialah Mati
Pado Tasangkuik di Lukah Anyuik

Sagalo tajadi kahandah Allah
Zat nan sagalo Maha Kuaso
antah takubua di dalam lurah
disinan mayik ka bapusaro...

O..alam elok Sudahi
baok lah hujan baliak kalawuik
Nan ba atah Bia di tampi
nan lah taserak kakami kawuik

Tuhan Kuaso Nan Punyo dunia
Barilah Tahu kapado kami
santano iko bantuak bencana
Mungkin kok kami nan lupo diri

sakiro iko bantuak cobaan
ateh musibah timpo batimpo
Kakami tampuang jo tapak tangan
Bia nak Kuek Ganggam Agamo....

50 kota sadang manangih
Ranah minang ikuik baduka
YaAllah ubek lah tangih
Apo kok hikmah di baliak duka

#Mari samo kito angkek Tangan untuak ba Doa..smoga Pasca bancano 50 kota..dunsanak kito di barikan kekuatan oleh Allah Swt Untuak Tabah dan kembali Mambangun Nagari.......Aamiin...
Ya Allah...